2015.05.03.「上帝國的學校」.陳振商牧師

經文:馬可四:21-34
聖詩:9、498、398
啟應:第40篇(以賽亞6)
金句:以賽亞六8

  咱知道,現代有真多學校,不同款的學校就會訓練不同款的學生,親像大學就是要培養教師,科技大學就是要訓練每一個行業的人才,神學院就是要培養傳道師,閣親像大專中心設立的目的,除了要佇大專院校裡面傳福音,引導學生進入教會以外,最主要愛培育學生有思考及判斷的能力,了解聖經的道理,而且將裀所理解的實踐出來,去利益咱的教會,咱的社會。

  那是耶穌帶領他的門徒,雖惘裀無學校的建築物,要不擱耶穌嘛佇訓練他的學生;這間學校有特別的所在,這是一個差派人的學校,差派裀要做甚麼,差派他的學生愛宣揚上帝的國度,而且這的國度是要降臨佇這世間,他教學的方式是耶穌帶領他的學生去實踐。

學校的差遣禮拜

  今仔日咱所讀到的經節,一開始他講燈要放在燈台上,無法度隱瞞,看到遮真困難來知影他在講甚麼!咱必須要從這章的一開始去看,才可以了解這段聖經的意思。一開始耶穌講一的比喻,他講一個撒種的出去撒種,他會遇到四種的狀況,他落佇路邊,鳥仔來就將它吃掉;落佇淺土的石頭頂,日頭出來就曬乾;落佇莿仔內,莿仔大叢就呷它遮著就無法度結實,落佇好的土地,就發起愈大欉,結實有的三十倍,有的六十倍,有的一百倍,後來耶穌又解釋講,撒種者是報揚道理,撒佇路邊,報揚道理的所在的,就是人聽道理,撒但來馬上就將所撒佇裀 心內的道理搶去。諸個撒佇石頭的地的,就是裀聽著道理,馬上歡喜承受伊,內面無根,到為著道理抵著有患難、窘逐,就跌倒。撒佇莿仔內的,就是人已經聽著道理,就因為世間的掛慮、錢財的迷惑,及別物的私慾入來,遮蔽彼個道理,就無結實。諸個撒佇好的土地的,就是人聽道理,亦承受伊,亦結實,有的三十倍,有的六十倍,有的一百倍。

  咱佇教會真愛去解釋講,咱愛準備好咱心內的田園,當上帝福音臨到的時,咱就會結實多多。所以咱要怎麼準備,就是愛咱抵擋撒但,呷世間的迷惑。不過人生本來多多的困難,呷咱意愛事,所以那是愛咱去抵擋真困難,尤其是撒但,在遮咱無做甚麼就被搶去。咱若是注意看這段經文是耶穌地對他的學生講話的時,咱就知影這是耶穌在教導他的學生。是裀要出去傳福音之前的在職訓練。就是親像神學生要對學校出去實習,耶穌教導裀所面對的環境是安怎,裀必須要用甚麼態度去面對。中心佇五月份的時,會舉辦一個差遣禮拜,目的是有一群學生,在中心受栽培、訓練,在大專學習怎樣做一個基督徒,其實基督徒就是「小基督」的意思,咱佇教會學習,為了將來成作基督耶穌這個世間臨在的代表,裀佇遮經過四年了後,他要面對另外一個生活環境,佇遮中心為裀祝福、請輔導為裀洗腳,給裀學習用同款的方式,同款的態度去服事別人,給每一個接觸的人攏可以感受,耶穌的疼臨在這世間。 

行所當行

  耶穌對著他的學生講解用比喻目的的時祂講:「上帝國的奧妙有互恁,若是許個外面人,凡事是用譬喻,互裀,看會看,也看bōe見;聽會聽,也bōe明;驚了裀越輪轉,來得著赦免。」咱會感覺上帝真無愛人得到赦免,這段經文是引用以賽亞書第六章,當上帝對以賽亞講:「我通差是誰啊?是誰欲為阮去?」以賽亞就講:「我佇遮,通差我!」看到上帝對以賽亞的呼召時,給人真感到真感動,這的呼召閣有一段故事,咱真少去看,上帝講:「你去給此個百姓講:恁聽是欲聽,總是bōe明白;看是欲看,總是bōe曉得。互此個百姓心鈍,耳孔重,目睭瞌密;免得裀用目睭看見,用耳孔聽見,心曉悟,越倒轉來得著醫好。」以賽亞就講:「主啊,這欲偌久啊?」上帝講:「到諸個城拋荒,無人徛起,厝內無人,土地極其拋荒。閣到耶和華遷徙許個人到遠遠,此個地多多放下teh。」這段的故事是上帝呷以賽亞講他愛面對的百姓就是按呢!裀無願意看、無願意聽、無願意相信,雖然按呢!上帝猶源疼世間人,猶源佇各世代差派先知去傳報上帝的訊息。從遮咱再來看21節講,「閣給裀講:人?燈來,豈是欲下佇斗下,抑是床下,豈呣是欲下佇燈台頂?」這句話希臘文直翻可翻做:燈來,是要互人放在斗下,抑是眠床下嗎?照希臘文來看,這句問句不是質詢,而是「反問」,燈來當然不是要隱藏,燈是要放在燈台頂。耶穌祂差遣他的門徒去傳福音,雖然會遇到多多的困難,祂猶源愛他的門徒持守自己的本份,做裀該做的,努力傳揚上帝國的福音,將燈放在該放的所在,呣是要隱藏起來。

  去年,當大家teh慶祝聖誕節的時,大專用「行所當行」這的主題來過聖誕節,阮用三齣的戲劇來表達佇學生時代,所會抵著問題,佇所愛面對的選擇佇傷腦經的時,要按怎藉著信仰團體,佇共同追求信仰的生活中間,去找尋上帝的旨意,要按怎找到上帝的旨意呢?愛佇信仰團體中彼此的分享,佇讀聖經彼此分享中去找尋。就是愛過團契的生活,彼此有團契。

  馬可在此也強調「聽」(可四23-24),咱要謹慎咱所聽的,這就是「聽探」的意思,是聽、思考、了解,去行。同款所講的,也正正落在咱的生活內底,透過「聽」,咱判斷咱四週圍的代誌,然後付出行動,就親像大專中心長久以來所堅持的學生基督徒的運動同款,新知的探究者-充實屬於自己專業領域的新知,培育探究新知的技術。真理的追求者-培養追求真理的精神及堅持真理的毅力。社會的批判者-對於社會發生的事情,以信仰來反省,並對不合理的事提出批判。社群的服事者-以實際的行動關懷社會,服務人群。就是在信仰的團體內面,面對這的世間所發生的代誌,有思考,有信仰的反省,用上帝對這世間的疼呷公義,去行出咱的信仰。耶穌講:因為見若有的,欲互伊;無的,連伊所有的也欲給伊搶去。(可四25)耶穌講見若願意聽探主的人,就是真正在上帝國內底,若無的,就是那些拒絕耶穌的人,裀只願意站在外面,耶穌講,連裀有的,就是裀所有的優勢,包括裀的傳統、血統及律法,攏給伊搶去,就是不法度在上帝的國度內面。

上帝的主權

  續落來耶穌明講,祂所要講的譬喻是關係上帝國的:「上帝的國親像人撒種佇地裡。暝時睏,日時起來,彼個種子發閣漸漸大,伊呣知彼個所以然。」(可四26-27)猶太人每一日的算法及咱不共款,因為上帝創造的頭一日,一開始,地是空空混沌,深淵的面上黑暗(創一2)。因為按呢,猶太人一日的開始是暗暝,耶穌所講的譬喻,是照猶太人的算法,暝時睏,日時起來,按呢是一日,在每一日每一日的經過內底,雖然咱種種籽落去,總是咱無法度料想會到,到底伊是怎樣大欉的。耶穌透過這個譬喻對咱講,咱愛知影上帝他有絕對的主權,祂在什麼時間要成就,要怎樣互伊大欉,甚至要佇什麼人的手中收割,咱攏不知,因為是祂的時,祂的手所做成的。佇每一年,阮舉辦畢契回娘家,阮大家佇分享當時在大專所受的訓練,對阮人生的改變,不只是對阮佇工作有真大的幫助,最主要的是改變阮生命的價值觀。佇阮當中有三位牧師,一位神學生,二位長老,阮的輔導分享講,他不知他撒出去的種子有一天會成作佇教會服事的好同工。就親像保羅先生所講的:「我栽種,亞波羅沃水,獨獨上帝互伊大欉。」(林前三6)不管是什麼事工,咱攏愛盡力去做。

無可限制的境界

  最後一的譬喻耶穌講起上帝國的特色:「是親像一粒芥菜子,撒落地,雖然比地上百項的種子卡細粒,若是已經撒落去,就發生,漸漸卡大佇攏總的菜蔬,閣發出大的枝,致到空中的鳥會歇伊的蔭下。」(可四31-32)不知咱有看過芥菜種子,它就親像原子筆點一點,耶穌佇遮用這麼小的種子,他說若是落在土就會發生,雖然種子小,撒出去就會發生,大叢,有時候咱看代誌小就感覺不需要去做,反倒轉種子沒撒出去,它猶原還是種子,沒有作用。上重要的是咱對上帝領受恩典,領受生命力,就是要分享。因為在咱佇上帝的國度內底,豈採咱所分享的一開始可能互別人看沒,互別人誤解,抑是佇現在咱無法度看得出成果的,親像芥菜子種籽共款的小,總是只要把握機會,願意釘根發生在祂所賞賜的土地頂頭,就會卡大佇攏總的菜蔬。

  簡單來講,上帝掌權的時,是在尚介軟弱的人身上,佇尚介微小的代誌顯出祂的作為;就親像咱的細仔,咱攏不知裀大漢會成作做甚麼款的人;不過,咱攏願意給裀栽培,因為咱可以佇裀的身上看見希望,就如同我的輔導,當我來大專的團契的時,我就呷他講,我住民間宗教大漢,而且我是大孫,所以我不可能受洗,不過我的輔導不無因為安那來放棄,他猶原陪伴我長大,直到現在我成為一位牧師。咱都不知影咱所作的會影響多大,只要咱願意將付出,就會親像芥菜子落在土裡,會大叢,大的枝會幫助更加多的人。

上帝的國

  豈採是在人的眼中感覺起來真困難的代誌,總是咱要盡上帝交待給咱使命,不管事長執,不管是團契的同工,也是會友,只要咱領受上帝福音的好處,咱就愛去努力就分享,豈採只是一個關心、一個安慰,只要做好自己的使命,上帝國就是對此來開始。希望咱這的信仰的團契中間,彼此代禱,就會成為耶穌的學生,共同完成耶穌的使命,給上帝國降臨在這塊土地上。