2013.07.07‧「真疼家己」‧蘇重仁牧師

「真疼家己」 
                (台語漢字)                

經文:約翰壹書四章12-21節
                        

序言:

   人的外表看起來如何?並毋是衡量人內心的指標,上帝所看重的是人的內心、內在的生命。人看重外表不是無重要,總是創造生命的主看內心閣較重要,這欲成做伊的生命,慢慢展現佇伊逐日日常生活中間。咱著者所讀的甲咱講:「所行完全、遵守耶和華的律法、專心尋找上帝的,這個人有福氣。」用心去找、毋是用外表的物件去找。是有心的時陣、意義就產生佇彼中間,疼心是人與動物能延續下一代的動力。正常講:「咱攏是爸母疼的結晶。」

   雖然有的囡仔是單親,單親無論外型是甚麼?猶久伊受懷孕的彼一瞬間是有疼的。會成做單親是後來有一方的疼變卦,也通講:變質、變卦的人,是不愛別人,失去家己的信用。當然,有的單親的老母是因為被強姦,但是因為有媽媽的疼、孩子才得存活。換句話講,疼是互你、我活到今仔日的動力,也是使人與動物成長的因素。

   當一個人愛花草的時,他攏會小心照顧沃水、修整。當花開真、發出芳味的時,伊就對佮香的中間,得著心情愉快、輕鬆。伊愛花照顧花、花也發出芳味佮它的,予伊心情爽快、伊是咧疼家己。人愛寵物:如狗、貓。今有人為狗、貓美容、化妝,亦有動物旅社、人欲出外一兩禮拜,伊就會通將狗、貓,寄佇動物旅館、他花費錢來減少擔心、掛慮心愛的狗、貓。

   非洲之父史懷哲為著疼非洲人,伊就轉去英國倫敦開音樂會,將所得著的錢,提轉去非洲幫助當地人。後來得著諾貝爾獎金,伊也將所得著的獎金,全部提出來起當時最現代化的病院,來醫治非洲人。佇遮咱看著的事實,就是有真正疼心的人,就會想辦法解決所面對的問題。今咱欲通過著者所讀的聖經,來分享真疼家己的幾項事。
 
第一項、 真正疼自己的人,一定是一位真正疼上帝的人。

   人若真疼上帝,伊就真愛親近上帝,就佇伊親近上帝的時,伊的確看著家己的不夠額、是無完整的、閣是會犯錯的一個罪人。因為,上帝親像一面鏡,是聖潔的鏡,所以親近祂的人就會看見家己的無完全、欠缺及污穢。所以真正親近上帝就會知罪、認罪,也因為按呢會通得著主的赦免,潔淨咱、減輕咱的重擔。試想若將重擔囥佇你、我的心頭,按呢暗時豈會好睏嗎?所以一個真正疼家己的人是一位聰明的人。因為上帝囥佇咱內底的靈是敏感的,當咱拄著上帝的時,咱的靈就會發現家己無夠額的所在。
   
    古代以賽亞當伊進入上帝的殿,看著上帝的榮光,伊就想著家己。所以每一擺咱到上帝的殿堂、抑是佇厝內靈修、讀聖經、吟詩、祈禱,咱應該是看著咱家己,毋是看著別人。咱來做禮拜毋是替別人做禮拜,是咱家己來親近上帝。咱看以賽亞彼時伊怎樣講,伊講:我有災禍啊!我滅無啦!因為我是嘴唇無清氣的人。我代先,然後才講:閣踮佇嘴唇無清氣的百姓中。伊毋是先講我踮佇嘴唇無清氣的百姓中,所以我受影響,毋是、是我代先嘴唇無清氣。伊目睭看著萬軍的耶和華,伊就看著這個事。

   若是咱的信仰最的事,就是續落去的代誌。聖經記載西拉兵就提熱熱的炭,甲伊潔淨,互伊會通重新開始。重新開始是欲做甚麼?伊聽見上帝甲伊講:我通差甚麼人?伊就應講:我佇遮,請差我。所以,佇認罪得著赦免了後結果,是欲去做上帝的工。毋是欲去誇口、展風神講:今我已經清氣了,上帝予我真濟恩典,毋是按呢。

   所以人佇上帝的面前,通過疼家己,來知的過失、來認家己的罪,上帝就欲赦免咱的罪、擦消咱一切的不義。罪人佇咱的法律按呢記載,人若自首、伊的罪會減輕。自首的意思是:我家己主動到法院、警政的所在,去承認我犯的過失,伊就會得著減刑。佇人的世界著會通用這種方法來減輕罪行,何況佇你、我,的內面,有上帝的形象,上帝疼你、我到怎樣。

   佇聖經有甲你、我按呢講:咱袂通看見兄弟目睭中的草仔幼,卻無看見家己目睭中的楹仔柴。咱常常有這款的失錯,想講目睭看出去就看著別人,其實目睭會當看鏡,也反照出家己。當咱看見別人的錯誤,頭一項咱愛做的是,就是看咱家己有遮的錯誤猶無?當咱看見別人佇犯罪中間的時,咱應該反省咱是毋是亦有犯像款的過失猶無?這是咱頭一項相佮想的物件。

 第二項、 一個真正疼家己的人,也一定是會疼別人的人。

   一位真正疼別人的人,就的確會寬容別人、赦免別人。別人是包含教會內佮教會外的人。赦免別人也就是真正疼自己真的表現。人知影家己的無夠額、不足、是無完整的、是會犯罪,哞得著上帝佮人的赦免,這是無夠額的,咱愛積極進一步去赦免、寬容別人。

   你、我知影當生命拄著挫折的時,咱的生命受創傷、艱難、鬱卒的時,咱需要上帝的赦免、醫治佮憐憫。親像按呢、別人拄著艱難、創傷,哞需要上帝佮你、我的寬容佮憐憫。通過按呢咱會看見,咱會看見咱的生命佇寬容的中間,咱就得著赦免佮醫治。

   一個毋甘願赦免人的人,其實是家己咧製造困擾佇伊的心、家己咧挖黑峒家己進入。伊的內心所有困擾,是無人會當幫伊解決。只有佇伊赦免人的中間,咱看見伊的心重擔會減少。一個怨恨、無赦免人的人,會影響伊家己的生活,無論伊的吃、伊的睏,甚至伊的血壓攏會受影響。 

    其實,人佇赦免別人的彼一刻,伊就開始體會著,上帝怎樣一項一項赦免伊、醫治伊。因為伊的心開始感受著,上帝的憐憫互伊的心情輕鬆、無有壓力、毋免緊張,互家己無踮佇烏暗的所在。馬太福音有記載,彼得問伊的師傅講:「我的兄弟得罪我,我赦免伊著幾擺?」這是咱真熟的故事,總是耶穌佇遮毋是咧甲伊講幾擺?咱毋是用七十個七擺來算。若欲用七十個七擺來算,咱哞會當用無像款的方法來說明。七是完全、七十是七的十倍,完全的完全是無通去算的物件。人哪佇遐咧算幾擺閣幾擺,可能按呢伊就需要吃藥、去心理治療抑是找精神醫生,通過食藥才會當睏。

   列位兄弟姊妹,聖經教示你、我赦免人、上帝也欲赦免咱。抵抵親像馬太十八章所記載:「按呢恁逐人無用心赦免恁的兄弟,就我的天父也欲按呢款待恁。」赦免人、其實是疼家己得著上帝赦免的一個真重要的關鍵。馬可十一章也按呢講:「見若恁徛咧祈禱的時,想著有人得罪你甚麼,就著赦免伊,互恁佇天裡的父也赦免恁的過失。」

   列位兄弟姊妹,佇新約按呢講,佇舊約的中間亦有一位我感覺真寶貴的,就是大衛王。伊的寬容、佮赦免,那親像咧將伊的重擔交互上帝。有真濟人赦免人,毋是對伊的心赦免,所以伊鬱卒、艱苦擋袂牢,因為欲互人感覺伊有赦免人,所以表面上哞佮彼個人真好,總是內心卻有問題。大衛卻毋是按呢,伊講:毋免為著做歹的人,心懷不平,也毋免為著遐的行不義的,生出怨妒。著愛靠耶和華來行好,上帝就欲賞賜你有氣力通去做成的工。大衛王的生命,是一個寬容別人生命的人,甚至愛伊的生命的人,伊有機會通甲伊,伊攏寬容伊。這個寬容互上帝疼伊,成做用一句話來講,伊是「合上帝心意的人」。

 第三項、真正疼家己是咧講甚麼?真正疼家己就是,咱永遠愛活佇疼無驚惶的中間。

   互相相疼咱會愈發見著咱無有驚惶,我相信咱中間有機會你找著的朋友,伊甲你講話攏講一半,你甲問落去,伊哞笑笑也袂甲你講。按呢表示伊的內心,猶有隱藏寡物件,袂通互你知。倒反來講:有可能是咱疼伊無夠,伊對咱無夠額信任。佇疼的中間,有時哞會錯誤。有時咱疼一個人是若親像咧恿一個人,所以台灣話有一句話按呢講:「恿豬夯灶、恿囝不孝。」就是老爸老母對囡仔的疼,無用適當的方法,致到囡仔袂曉體會。

   當然聰明的囡仔,佇愈成長的時陣,伊會去寬容老爸、老母,知影老爸、老母是無職照的,老爸、老母哞需要佇成長的過程中,繼續學習來怎樣教怹的囡仔。總是有寡囡仔卻毋是按呢想,伊感覺我已經按怎、按怎,我以後欲按怎、按怎。有閣較嚴重是,囡仔將老爸、老母所教伊的方法,完全不變來教伊的後代。伊無塊想時間的變化,無想時代有真濟不同的物件。若是咱應該踮佇相疼的中間,來看見上帝佇你、我的身上,有的物件通幫贊你、我來幫贊別人。有新的方法通幫助你、我來扶持別人。

   有一個人咧描寫一個家庭,一個囡仔咧飲果汁的時,忽然間囡仔提無真牢,玻璃杯佮果子汁續摔落佇土腳。這講起教囝的人就開始問爸母:你頭一句話欲講甚麼?這嘛是佇家庭教育的內面,怹咧問爸母的一句話?我聽見的,有的人講:當然頭一句就是甲伊罵阿,「你按怎絃仔無小心,我教你幾十擺愛小心?」有人按呢罵,敢毋著。著、老爸、老母已經甲伊講幾十擺啦。總是,我毋知這位老爸、老母有咧想講,較早伊的爸、母哞甲伊教幾十擺,伊毋知有照按呢行猶無?不過上界的答案,蓋成是按呢。就是伊講:囝阿、你有受傷猶無?囝若講無受傷,按呢你去提桌布咱做夥來清。有的爸、母甲囝講:你家己去清,你負責任、你歹的。伊講毋是,「咱做夥來清」。

   其實上帝佮你、我常常逐日相同行,是只有有當時咱袂去感受著。佇老爸、老母通過佮伊相同清的中間,咧教示囝兒家己負責任。哞教示囝兒講:毋免驚,佇失錯若會當調整,有爸母猶久會繼續扶持。你、我的上帝就是這款的上帝。

   你、我需要學習佇疼上帝佮疼人的中間,來疼上帝、敢認罪;來疼人、寬容別人;佇相疼的中間來成長。來佇會當常常相疼的中間來成長,上帝就欲互有真正疼心的人,就是疼別人、也疼家己的人,伊的面有上帝的榮光,伊的面無必要有真濟埋怨的面形。佇伊生命的中間,咱就欲看見,伊就是上帝活活的見證者。一個人見證用嘴來講真重要,你來信耶穌有平安,總是當你咧甲人講的時,你的面若無笑容,你的面若無平安,伊雖然會甲你講:好阿、好阿,總是伊永遠袂綴你去教會。

   一個人娶人來到上帝的面前,是親像咱著者所咧讀、抑是著者所咧背的。「恁若相疼、眾人欲對按呢知,恁是我的學生。」伊毋是咧講理論,伊是咧講你、我的生命。佇相疼的中間,咱就會看著重擔會減輕,因為相扶持、相同擔重擔,重擔自然會減輕,問題哞會減少。佇無相疼的中間、紛爭增加、重擔愈濟,壓力哞愈濟。所以聖經有甲你、我按呢講:看阿、兄弟和好相佮徛起,是何等的、何等的安樂。佇相疼的中間,你會看見上帝的恩典充滿佇彼個所在。是怹家己製造的,因為怹有用上帝的疼來疼別人,來疼兄弟姊妹。

 結尾來講:

   生命佇逐日生活中,是愛小心選擇的,你、我若欲選擇無私的疼家己,有真正疼家己,就袂無形中扭曲真正的疼。佇認罪、認錯、知影家己的軟弱,就得著上帝的赦免、補足與扶持,有力通去行逐項的好事。佇赦免的時,咱就看見咱的寬容、憐憫,咱就找著上帝閣一擺赦免咱、憐憫咱,上帝也欲互咱有夠額的恩典,通去運行佇咱所拄著艱難的中間。佇互相相疼的中間,你、我就欲發現上帝果然佇你、我的內心深沈的所在,互咱有平安、平靜、輕鬆、爽快、會通安然自在的心情,來經過逐日日常的生活,通幫贊別人、扶持別人佮上帝同行。願主幫贊咱會做智慧的選擇。